L’arreforma
Entamó la reforma de la Llei básica d’Asturies, una reforma impulsada dafechu por Izquierda Xunida. Nesti estáu, nesti país, onde l’85% de la xente vota lo mesmo, el PSOE y el PP pónense d’alcuerdu pa facer que’l nuevu Estatutu d’Asturies siga siendo una caxigalina, relegar a Asturies a la tercera división de les comunidaes autónomes, al tiempu que deciden marxinar a Izquierda Xunida de la negociación del mesmu. La pinza nun ye esa a la que se refieren Javier Fernández, secretariu xeneral de la FSA, o Tini Areces, presidente d’Asturies, l’auténtica pinza, l’auténticu engañu, ye que mesmo la FSA-PSOE como’l PP comparten un mesmu modelu d’estáu, d’economía, de sociedá, de política esterior. Como diz el parlamentariu popular Joaquín Arístegui «Aquí hay un acuerdo básico entre el PP y el PSOE porque los socialistas de Asturias, frente a los de otros sitios, tienen un modelo de Estado bastante similar al nuestro». Y n’Asturies entovía los hai que siguen naguando por esa boina gabiniana…Lo fundamental d’esta reforma reside n’enanchar los derechos sociales de la ciudadanía asturiana, reconocer cuestiones básiques como ye la oficialidá del asturianu, el derechu subxetivu a la vivienda, la organización del territoriu, la financiación de los conceyos, les competencies municipales, la xestión política de los recursos naturales, onde se recueya un plan industrial p’Asturies, la diversificación industrial, un modelu d’enseñanza públicu dende los 0 años hasta la Universidá, un modelu de sanidá pública con una rede pública de verdá y nel que se busque la eliminación de les llistes d’espera, que recueya la convocatoria anticipada d’ellecciones, la voz qu’ha tener Asturies naquellos foros au se debata sobre les cuestiones del nuesu desarrollu… en resume facer un Estatutu pa los y les asturianes, y non como pretenden dende PP y PSOE, dende’l sistema, facer un corta y pega de dalgún otru Estatutu de segunda qu’en nada va satisfacer les necesidaes d’Asturies