L´AVARICIA
Pa muncha xente falar y entender d´economía resulta dalgo sumamente complexo y opaco, cuasi una misión imposible. Cuando dalgo tan fundamental y cotidiano com ye la xera económica se torna tan poco tresparente pa la mayoría de la ciudadanía, ún nun puede evitar sentir rocea hacia dicha situación. Sicasí, a poco que quitemos toa esa rodiella de pallabrería ´técnica´ que l´antroxa podemos entamar a esclariar dellos principios mui cenciellos con unes consecuencies abondo nefastes pa la mayoría de la sociedá, o polo menos ésa ye la conclusión que saca un ´lego´na materia como yo.
Ún de los principios fundamentales qu´informa tola xera económica ye éste: ´Algamar el másimu beneficiu al menor coste´Polo tanto, too queda xustificao si se producen beneficios y rentabilidá. Eso esplica por qué cientos de persones muerren náccidentes llaborales ( invertir en seguridá resta beneficiu). Dende esti principiu, términos como competitividá tórnense en verdaderos cuchiellos que dixebren y mutilen miles d´aliendos vitales arrequexándolos na más absoluta marxinalidá. Esti principiu aplicáu al tarrén de toos y toes ( lo publico) supón la privatización de la solidaridá, la cuantificación y rentabilización de la mesma y, poro, la tresformación de dalgo digno y necesario pa la sobrevivencia, nun sentimientu fondu d´avaricia ( Qué gano yo nesto).
Otru de los principios económicos ( cuasi podríen denominase teolóxicos pola so intocabilidá) ye´l de ´El mercau autorregúlase´. Esto ye la última versión de la llei del más fuerte. Si yo puedo medrar, ¿ por qué van poneme pilancos que lo impidan? O, si se quier llevar a otru contestu´l mesmu principiu, diba ser asina. << Si yo tengo un coche que corre a 300 kilómetros per hora, ¿ por qué ponen eses siñales que me llimiten a la capacidá que poseo? Si los demás tienen una ´pataca´de coche, ¿ qué culpa tengo yo?>>. Una economía de mercaú que nun tenga midiés que la equilibren -midies que l´axusten a la sociedá o sociedades que la sostienen a traviés de los recusos económicos públicos, infraestructuras, patrimoniu ecolóxico, capital social ( trabayadores), etcétera, sofitaos nunos principios de solidaridá, igualda y xusticia, dexenera nuna especie de darwinismo social onde los más fuertes ( fortaleza algamada siempre a resultes de destruir a los más febles) medren ensin llende, dexando al pasu un regatu de probitú, miseria y marxinación social.
Los equilibrios sociales sofitense nel repartu de la riqueza, que ye lo que nel fondu fai exposigar una sociedá. La cultura, la educación, la igualdá en tola ciudadanía, la superación del modelu consumista como ´relixión´que da sentíu a la nuesa esistencia, lésmolecimientu y la implicación poles cuestiones de la ´polis´y la sensibilidá y empatiá con quien ye diferente son dalgunes de les cuestiones que podríen sacanos d´esti sistema de mercáu que tres de lo so aparente complexidá escuende dalgo tan cenciello y gafo como ye l´avaricia; eso sí, amazcarada de rentabilidá, eficacia, complexidá…
Pablo Fernández
Boceru del Bloque por Asturies y conceyal de IU-BA de Gozón